FH-stúlkur mættu í Mýrina á föstudagskvöldið til að leika gegn Stjörnunni. Ekki var kannski búist við neitt sérlega spennandi leik og það kom á daginn.

Stjarnan byrjaði með miklum látum. Lék ágæta vörn og refsaði FH grimmilega með hraðaupphlaupum. Um miðjan hálfleik hafði Stjarnan skorað 12 mörk gegn 4 og höfðu þrjú marka FH komið úr vítaköstum. Áfram hélt Stjörnuvélin að malla og þegar flautað var til hálfleiks var sigurinn nánast í höfn en þá var staðan 21-9. Solla hafði farið hamförum þessar fyrstu 30 mínútur og gert tíu mörk og leikið sérlega vel í vörninni líka. Þá hafði Kristín verið ágætlega á verði bak við aktíva vörn. Þessi munur hefði auðveldlega getað verið meiri – ef nokkur sannkölluð dauðafæri hefðu verið nýtt.

Það hefur loðað við liðið í undanförnum leikjum að mæta frekar kalt inn í seinni hálfleikinn og missa niður þá stöðu sem búin hafði verið til í fyrri hálfleik og í þessum leik var það sama upp á teningunum. Værukærð í vörninni, lítil markvarsla og aukning á tæknifeilum þýðir ekkert annað heldur en vatn á myllu andstæðingsins og eftir 20 mínútna leik hafði FH náð að minnka muninn í 8 mörk, 29-21. En Stjörnustelpurnar tóku sig saman í andlitinum seinustu mínúturnar og sigldu heim öruggum 14 marka sigri 38-24.

Solla var eins og áður sagði, sjóðheit í leiknum – sérstaklega í fyrri hálfleik og Hanna var mjög drjúg í markaskorinu. Þá áttu Sandra og Hildur flottar innkomur.

Markaskorar Stjörnunnar: Solla 15, Hanna 8 (2v), Sandra 4, Hildur 4, Rut 3, Guðrún Hrefna 2 og Esther 1 mark.

Kristín varði 12 skot og þar af fóru 4 aftur til mótherja. Helga varði 2 bolta og fóru þeir báðir aftur til mótherja.

Stjarnan fékk ekki marga daga hvíld eftir bikarleikinn og mætti í Digranesið á laugadag til að spila gegn HK. Leikir liðanna hafa verið jafnir í undanfarin ár og því mátti búast við hörkuleik.

Stjarnan byrjaði ekki vel fyrstu mínúturnar og eftir fimm mínútna leik var HK með forystu 4-1. Þá kom glimrandi kafli hjá Stjörnustelpum sem þéttu vörnina og léku á alls oddi í sókninni og skoruðu grimmt. Staðan eftir tuttugu mínútur 9-15. HK náði aðeins að minnka muninn seinustu mínúturnar en Stjarnan var með góða forystu í hálfleik 15-20. Skotnýting í hálfleiknum var flott eða 71% og sóknarnýting einnig fín 59% , þar sem tæknifeilar voru fáir og fátt sem benti til annars en góðra úrslita.

Segja má að seinni hálfleikurinn hafi verið alger andstæða fyrri hálfleiksins. HK byrjaði á að setja tvö mörk en Stjarnan náði að halda sæmilga í forystuna fyrsta korterið en þá var staðan 21-24 Stjörnunni í hag. Þá kom hörmulegur kafli þar sem Stjörnuliðið var m.a. einum leikmanni fleiri en tapaði þeim kafla 0-2 ...eitthvað sem á bara alls ekki að gerast. Á þessum kafla komst HK yfir 25-24 og lét ekki forystuna eftir það þrátt fyrir að Stjarnan ætti nokkra möguleika á því að jafna leikinn, þá virtist allur rythmi úr þeim og vörn og markvarsla tikkaði alls ekki inn. Lokatölur urðu 32-30 HK í hag og varþað súrt í broti þar sem Stjarnan leiddi lungann af leiknum og var betri aðilinn lengst af. Skotnýting í seinni hálfleiknum var slök eða 41 % og sóknarnýting 33%. Heildarnýtingin var því 57% skotnýting og 46% sóknarnýting – ekki slæmar tölur en þar sem varnaleikur var ekki nægilega góður þá dugði það ekki til. Hanna afmælisbarn og Solla voru iðnastar við markaskorið í leiknum og sýndu oft góða takta. Flestir leikmenn áttu fínan leik í sókninni en andvaraleysi á krítískum tímapunkti í seinni hálfleik gerði út um sigurvonirnar.

Markaskorar Stjörnunnar: Hanna 9 (4v), Solla 7, Rut 4, Esther 3, Þórhildur 3, Hildur 2 og Sandra 2 mörk.

Kristín varði 16 skot í markinu og þar af fóru 7 aftur til mótherja. Helga varði 3 en þar af fór 1 aftur til mótherja.

Stjarnan lék öðru sinni á skömmum tíma gegn Val í Vodafonehöllinni á miðvikudagskvöldið. Að þessu sinni var það í 4 liða úrslitum Bikarkeppninnar. Jóna var með að nýju eftir meiðslin og Solla hafði legið í flensu í vikunni en var samt mætt inn á gólf , meira af vilja en mætti.

Stjarnan hóf leikinn og setti strax mark en Valur jafnaði fljótlega og komst svo yfir og hafði í raun frumkvæðið eftir það. Eftir tíu mínútur var staðan orðin 5-3 Val í hag og eftir fimmtán mínútur, 8-4. Skömmu síðar meiddist Jóna aftur á öxl og varð að fara af velli og mun líklegast verða eitthvað frá á næstunni. Stjarnan náði að halda í horfinu næstu fimm mínútur og þá var staðan 10-7 en eftir það kom fremur slæmur kafli og settu Valskonur fjögur mörk í röð og breyttu stöðunni í 14-7. Stjarnan átti svo ágætis endasprett og náði að minnka muninn aðeins ( hefði m.a.s. getað minnkað mun meira ef góð færi og víti hefðu nýtst). Í hálfleik var staðan 16-10 Val í hag.

Stjarnan byrjaði af ágætum krafti í seinni hálfleik og náði að minnka muninn í fjögur mörk fyrstu fimm mínúturnar, 18-14. Valur náði að stoppa áhlaupið og hélst sex marka munurinn frá því í hálfleik, allt þar til tuttugu mínútur voru liðnar af hálfleiknum en þá var staðan 29-23. Eins og sést á þessum tölum gekk mun betur að skora í seinni hálfleiknum hjá Stjörnunni og ef vörn og markvarsla hefði verið betri er aldrei að vita hvað hefði getað gerst. En á þessum tímapunkti gafst Stjörnuliðið hreinlega upp og Valur gekk á lagið og skoraði mörg einföld mörk á skömmum tíma. Staðan þegar fimm mínútur voru eftir 34-24. Stjarnan náði að minnka muninn í lokin og þegar flautað var til leiksloka var sjö marka tap staðreynd 35-28. Skotnýting liðsins var 52% og sóknarnýting 41%. Tæknifeilar voru þó óvenju fáir eða 14 talsins en til að vinna sterkt lið eins og Val þarf líka góða vörn og markvörslu og að þessu sinni voru það aðallega hraðaupphlaup Valsstúlkna og seinni bylgjan sem reyndist Stjörnunni erfitt að stoppa. Rut átti fínan leik fyrir Stjörnuna og skoraði grimmt – einkum í seinni hálfleiknum. Þá átti Esther flotta innkomu og stjórnaði sóknarleiknum ágætlega lengst af og var baráttuglöð.

Markaskorar Stjörnunnar: Rut 7, Esther 4, Hanna 3 (1v), Þórhildur 3(1v), Sandra 3, Jóna 3(1v), Solla 2, Guðrún Hrefna 2 (2v) og Arna 1 mark.

Fengin víti: Esther 3, Rut 2, Guðrún Hrefna 1 og Þórhildur 1 víti.

Kristín varði 6 skot í markinu og fóru 4 aftur til mótherja. Helga varði 4 og fór 1 aftur til mótherja.

Stjarnan heimsótti topplið Vals á Hlíðarenda sl. laugardag. Jóna Margrét var ekki með vegna meiðsla að þessu sinni.

Segja má að sóknarleikur hafi ekki verið hávegum hafður í fyrri hálfleik eða þá að varnir og markvarsla hafi verið í fínu lagi....nema hvorttveggja sé J Staðan eftir tíu mínútna leik 3-2 fyrir Val. Þá kom ágætur kafli hjá Stjörnunni sem náði forystunni 4-5. Eftir þennan fína kafla kom 12 mínútna markaþurrkur og náði Valur aftur yfirhöndinni og leiddi þá 7-5. Bæði lið náðu síðan að bæta tveimur mörkum við fyrir hálfleik og því var staðan 9-7 þegar liðin gengu til búningsherbergja.

Seinn  hálfleikur byrjaði hörmulega og eftir sex mínútna leik var staðan orðin 13-7 Val í hag og áfram héldu þær áfram að auka muninn enda Stjörnuæiðinu fyrirmunað að koma boltanum í mark og að auki gerðu þær sig seka um fjölmarga tæknifeila. Staðan eftir tuttugu mínútur 19-11. Seinustu mínúturnar gekk betur að skora en vörnin var slök á móti svo ekki náðist að minnka muninn. Lokatölur 15-24. Skotnýting var 44% og sóknarnýting 26% þar sem tæknifeilar voru 22 talsins og leikmnönnum gekk illa að koma boltanum fram hjá Jennýju markverði Vals.

Jákvæðu punktarnir úr leiknum var ágætur varnarleikur á köflum – sérstaklega í fyrri hálfleik og fín markvarsla Kristínar sem varði jafnt og vel allan leikinn.

Markaskorar : Solla 5, Hildur 3, Þórhildur 2, Esther 2, Hanna 1, Helena 1 og Guðrún Hrefna 1 mark.

Kristín varði 18 skot í markinu og fóru 2 skot aftur til mótherja.

Stjarnan hélt í Digranesið sl. miðvikudag til spila bikarleik gegn liðið HK. Í fyrra náði HK að slá Stjörnuna óvænt út úr bikarnum og því átti Stjarnan harma að hefna.

Stjörnustelpur settu fyrsta markið en HK svaraði strax með marki úr vítakast og komst síðan yfir nokkrummínútum seinna með marki úr öðru víti. Þá kom ágætur kafli hjá þeim bláklæddu sem leiddu eftir 10 mínútna leik 2-4. Næstu mínútur jafnaðist leikurinn aðeins og eftir rúmar 20 mínútur var staðan orðin 7-6 HK í vil. Þá kom flottur kafli í vörninni og náðu Stjörnustelpur fjölmörgum hraðaupphlaupum og náðu að breyta stöðunni í 9-12 sér í hag. HK náði aðeins að laga stöðuna og því munaði aðeins þremur mörkum í hálfleik 10-13.

HK byrjaði heldur betur í seinnihálfleiknum og eftir 5 mínútur var staðan 13-14 en Stjarnan náði þá aftur góðum kafla og sleit sig aðeins frá og leiddi 14-18 eftir tíu mínutna leik. HK minnkaði muninn í 16-14 en Stjarnan svaraði með öðru áhlaupi 16-21. Þá kom slæmur kafli og HK gekk á lagið og minnkaði muninn í eitt mark 20-21 og níu mínútur eftir af leiknum. Stjörnustelpur voru sterkari á endasprettnum og innbyrtu góðan sigur 22-25. Skotnýting liðsins var 58% og sóknarnýting aðeins 39%. Þessi slaka sóknarnýting kom ekki að sök í dag þar sem varnarleikurinn var aldrei þessu vant í ágætu lagi og markvarslan jöfn og góð.

Stjarnan er því komin í úrslit og mun leika gegn Val þann 8. febrúar nk.

Markaskorar Stjörnunnar: Solla 7, Hanna 6 (1v), Jóna 6, Rut 3, Hildur 2 og Þórhildur 1 mark.
Fengin víti: Esther 1 og Jóna 1.

Kristín stóð allan tímann í markinu og varði ágætlega eða 10 bolta og fór aðeins 1 aftur til mótherja.